Հարգելի LIANNA, օվալաձև անցքը գտնվում է միջնախասրտային միջնապատի վրա, խնդրում եմ ճշտել, թե կոնկրետ որ հատվածում է դեֆեկտը, միջփորոքային, թե միջնախասրտային միջնապատի վրա: Եթե խոսքը այնուամենայնիվ օվալ անցքի մասին է, այն ներարգանդային կյանքի ընթացքում ապահովում է կապը արյան մեծ և փոքր շրջանառությունների միջև, քանի որ դեռ թոքերը չեն մասնակցում շնչառությանը: Երեխայի ծնվելուց հետո այն փակվում է երեխայի կյանքի առաջին 1-1.5 տարիների ընթացքում: Անհանգստանալու կարիք այժմ չկա: Խորհուրդ է տրվում դինամիկ հսկողություն: Եթե մինչև նշված ժամկետները այն ինքնուրույն չի փակվում, ապա կախված դրա չափերից և առկա կլինիկական դրսևորումներից որոշվում է հետագա բուժման պլանը: Փոքր չափերի դեպքում մեծ մասամբ անցքը ինքնուրույն փակվում է, և վիրահատության կարիք չի լինում, բաց օվալ անցքը չի խանգարում երեխայի նորմալ աճին և  զարգացմանը:

Հարգելի Armen, միգուցե Դուք ի նկատի ունեք վիրահատությունից առաջ կնքվող պայմանագիրը, որտեղ տեղեկացվում է վիրահատության ընթացքի և հնարավոր բարդությունների մասին, որի տակ ստորագրում են վիրահատվողը և նրա խնամակալը, կոնկրետ այ դեպքում ծնողներից որևէ մեկը:

Հարգելի Armen, սրտի վրա կատարվող բոլոր վիրահատություններն էլ բարդ են տեխնիկական առումով: Սակայն Հայաստանում նման վիրահատություններ հաջողությամ կատարվում են արդեն երկար տարիներ:

Հարգելի Armen, հիմնական բարդություններն են սրտի ռիթմի խանգարումները, սրտի խոռոչների լայնացումը, թոքային զարկերակի հիպերտենզիան, ի վերջո սրտային անբավարարության զարգացումը:

Հարգելի Hripsime, հարկավոր է սպասել և հուսալ, որ դեֆեկտն ինքնուրույն կփակվի: Եթե այն փոքր չափերի է, շատ մեծ է հավանականությունը, որ ինքնուրույն կփակվի, թեկուզ և առաջիկա 6 ամիսների ընթացքում: Եթե անգամ այն ինքնուրույն չփակվի, հնարավոր է, որ փոքր չափերի պատճառով վիրահատության կարիք ամենևին էլ չլինի:

Հարգելի Armen, բարև Ձեզ: Ներկայացված դեպքում բուժման միակ տարբերակը վիրահատականն է, և որքան շուտ կատարվի վիրահատությունը այնքան ավելի մեծ հավանականություն կա խուսափել հետագա բարդություններից: Ինչպես նշել եք, կլինիկական ախտանիշներ դեռ չկան, որը շատ լավ է: Ցանկալի է նախատեսված ժամկետից ավելի ուշ չկատարել վիրահատությունը:  

Հարգելի Hripsime, եթե դեֆեկտի չափերը ի սկզբանե փոքր են, ապա ինքնուրույն փակվելու հավանականությունը շատ մեծ է: Հնարավոր է, որ շատ փոքր դեֆեկտի դեպքում վիրահատության կարիք չլինի: Սակայն դրա մասին խոսելը դեռ վաղ է, հարկավոր է սպասել մինչև երեխայի 1.5 տարին լրանալը:

Հարգելի Hripsime, 1,5 տարեկանից հետո օվալ անցքի չփակվելու դեպքում ցանկալի է, որքան հնարավոր է շուտ կատարել վիրահատությունը: Եթե վիրահատությունը կատարվի ժամանակին, ապա սիրտը լիարժեք առողջ կլինի և հետագայում խնդիրներ չի առաջացնի:

Հարգելի Gevorg, քանի որ արդեն կա սրտի խոռոչների լայնացում, ապա վիրահատությունից հետո սրտի աշխատանքը կբարելավվի, բայց լիարժեք չի վերականգնվի: Ինչ վերաբերում է վիրահատության ժամկետներին, ապա դա կախված է սրտի աշխատանքից: Կարծում ենք Ձեր բժիշկը ավելի հստակ պատկերացում ունի վիճակի մասին և ավելի հստակ խորհուրդ կարող է տալ` կարելի է հետաձգել վիրահատությունը, թե ոչ:

Հարգելի Hripsime, գրիպը անմիջականորեն ազդեցություն չունի արատի չփակվելու հետ: Սակայն, եթե կա իմունիտետի անկում, և երեխան հաճախակի է հիվանդանում գրիպով, ապա հարկավոր է դիմել բժշկի, որպեսզի նշանակվի իմունիտետը բարձրացնող միջոցներ:

Հարգելի Mnatsakan, գոյություն ունեն սրտի բնածին արատի տարբեր տեսակներ, և կախված նրանից թե արատը որ հատվածում է, այն ունենում է տարբեր կլինիկական դրսևորումներ: Որոշ արատներ անհամատեղելի են կյանքի հետ, իսկ որոշ արատներ կլինիկական ախտանիշներ չեն ունենում, և մարդն ամբողջ կյանքի ընթացքում չի իմանում դրա մասին: Խնդրում ենք կոնկրետ նշել, թե որ արատի մասին է խոսքը:

Հարգելի Gevorg, բարև Ձեզ ներողություն ենք խնդրում հարցին ուշ պատասխանելու համար: Ինչպես նշել եք Ձեր հաջորդ մեկնաբանության մեջ Ձեր եղբոր մոտ առկա է միջփորոքային միջնապատի դեֆեկտ, որը բավականին մեծ է, և եթե սրտի խոռոչները արդեն լայնացել են ուրեմն սրտային անբավարարությունը դեկոմպեսացիայի փուլում է, և որքան հնարավոր է շուտ պետք է կատարել վիրահատություն, վիճակը էլ ավելի չբարդացնելու համար: